Dimeurzh da noz, 'n oa diskleriet eil prezidant rann-vro Breizh lâ oa bet ehanet gant labourioù klask mengleuzhioù an embregerezh Virascan Mines. Olivier Allain a zo o kaballiñ evit bezañ kannad e anv ar strollad Republik War-Raog. Embanniñ a ra bezañ a-enep ar c'hleuziañ, ha dibaoe nebeut 'zo emañ ezel deus Vigil-Oust, o stourmiñ enep ar minoù. M'en eus ehanet e labourioù Variscan Mines, n'eo nemet evit maread an dilennadegoù. 'Benn ur sizhunvezh ac'hann 'zo prevezet evit an embregerezh bro Aostralia un emgav gant ministr an Endro Nicolas Hulot. N'o deus ket kalz fiamant mui ar c'hevredigezhioù e diskleriadennoù ar Rann-vro. Dimeurzh just a-walc'h, e oant o vanifestiñ, lâret oant bet treizet gant ar c'huzul rann-vro, ha n'en oa ket soutennet 'nezho ken krenn giz prometet. Goulven ar Gak a zo perzh deus Douar-Didoull, ur strollad en em savet enep da raktres mengleuz Lokenvel. Kendalc'het vez ar stourm gant Douar Didoull : 'benn an 23 a viz Even, e vo aozet un abadenn evit lakaat Koad an Noz dindan evez ar bobl. Ha 'benn miz Gouere vo aozet gouel ar stourmoù e Plougoñver, ha pedet an holl c'hevredigezhioù enep d'ar raktresoù min, pe vefent e Breizh, e bro C'hall, pe c'hoaz e bro Giuiana.