Klemm zo savet enep ar strollad Ai'ta gant an UBS. Hiziv oa galvet unan eus stourmerien ar c'holektif da vezañ aterset e komiserdi Gwened. Savet e oa bet klemm gant skol-veur ar c'hreisteiz goude un oberenn graet e miz eost paseet en Oriant. Divontet oa bet pannelloù ar skol-veur ha roet anezho en-dro e-korv Emvod ar Gelted. Un oberenn arouezus da c'houlenn ma vo muioc'h a vrezhoneg er skol-veur ha ma vo krouet un aotregeezh da stummañ ar skolaerien o deus c'hoant labourat e brezhoneg. 20 a dud oa deuet da Wened da souten ar stourmer. Ur reportaj gant Yaelle ar Mouel. A-benn ar fin e vo dalc'het ar c'hlemm hag ur prosez e miz C'hwevrer ar bloaz a zeu.