'Benn fin ar bloaz 'vo lañset al labourioù bras da gempenn porzh Vrest. 220 million a euroioù a vo postet 'vit sevel ur c'hae bras lec'h ma 'vo tu sevel traoù ponner 'giz milinoù avel da skouer. Degas un nerzh nevez fell da Rannvro Breizh a zo perc'henn war ar porzh ha diorren an ekonomiezh e kornog Breizh. Hervez kont 'vefe krouet muioc'h 'vit 1000 plas labour a-drugarez d'ar porzh nevez. Al lodenn gentañ ha pouezusañ eus ar chanter a vo echu 'benn 2018, ha disoc'h 'vo gant al labourioù e 2020. Milinoù mor a vo staliet er vro hag afer 'zo kaout plas 'vit sevel anezho. Setu unan eus palioù al labourioù kreskiñ ar porzh hervez Gérard Lahelleg, bez-prezidant ar rannvro e-karg eus an transportoù. Selaouomp anezhañ ouzh mikro Erwan Blanchard.